क्रेज बढ्न थालेपछि स्कूलमा अब क्रिकेट कोर्ष

टेलिभिजनमा क्रिकेट हेर्न थालेपछि धादिङ नलाङको मिन्दुका माविका विद्यार्थीहरु हिजो आज स्कुलको मैदानमा काठको मुङ्ग्रो र बल हातमा लिएर उफ्रने गर्छन् ।
खेलको ज्ञान र नियम पुरै थाहा नभएपनि उनीहरु टेलिभिजनमा देखेको बलिङ र ब्याटिङको नक्कल गर्दै चौका, छक्का, आउट, विकेट भन्दै ताली र सिटी बजाउँछन् । विद्यार्थीहरुलेखेलेको देख्दा शिक्षकहरुलाई पनि स्वाद पर्न थालेको छ । ‘विद्यार्थीहरुले बिस्तारै क्रिकेटप्रति रुची राख्न थालेका छन्, तर खेल्न मिल्ने मैदान चाहिँ छैन’ स्कुलमा शारिरीक शिक्षा पढाउने शिक्षक रामचन्द्र रिजालले उज्यालो अनलाइनसित भन्नुभयो ।
स्कुलमा पढाई नभएको बेला भलिबल, फुटबल, कपर्दी, छक्काईलगायतका खेल खेल्ने बानी परेका विद्यार्थीहरुमाबल्ल क्रिकेटको लत बस्न थालेको हो । ट्वान्टी ट्वान्टी विश्वकपमा नेपालको शानदार प्रदर्शनसँगै गाउँ टोलमा यसैगरी क्रिकेट क्रेज ह्वात्तै बढेको छ ।
यसअघि क्रिकेटमा चासो नराख्ने र खेल नबुझ्नेहरु समेत हिजोआज छक्का, चौका, बलिङ, ब्याटिङ मिसाएर क्रिकेटको कुरा गर्छन् । सरकारले पनि क्रिकेट मैदान बनाउने योजना अगाडि सारेको छ । क्रिकेट खेलाडीले पाएको सम्मान र वाहवाहीबाट धेरैजना उत्साहित भएका छन् । मैदान र पूर्वाधार नहुँदा पनि क्रिकेटले अन्तर्राष्ट्रियजगतमा नेपालको नाम उच्च राखेको भन्दै सबैले यो खेलको विकासमा जोड दिएका छन् । क्रिकेटको जग बलियो बनाउँदै अभ्यास र प्रेरणामा बल पुर्याए मात्र क्रिकेटको भविष्य राम्रो हुने खेलाडीहरु बताउँछन् । स्कुल तहदेखि नै क्रिकेट शिक्षा दिनुपर्ने उनीहरुको माग छ । माग र चर्चा बढ्न थालेपछि अब स्कुल तहमा क्रिकेट कोर्ष राख्ने तयारी भएको छ । निजी विद्यालयहरुले यसै वर्षदेखि शारिरीक शिक्षामा क्रिकेट खेल समावेश गर्ने योजना बनाएका छन् भने सरकारले पनि सकेसम्म छिटै पाठ्यक्रम बनाउने तयारी थालेको छ ।
‘माग र रुची बढ्दै गएकाले स्वभाविक रुपमा क्रिकेट खेल सम्बन्धी पाठ्यक्रम पनि अब समावेश हुन्छ’ शिक्षा मन्त्रालयका सहप्रवक्ता डा. रोजनाथ पाण्डेले उज्यालो अनलाइनसित भन्नुभयो । नियमित रुपमा पाठ्यक्रम परिमार्जन हुने बेला अब विद्यालयस्तरमा क्रिकेट खेल सम्बन्धी पाठ पनि राखिने उहाँले बताउनुभयो ।
सरकारले हरेक ५/५ वर्षमा सामान्य र १०/१० वर्षमा पूर्ण रुपमा विद्यालयको पाठ्यक्रम परिमार्जन गर्दै आएको छ । कक्षागत रुपमा पाठ्यक्रम परिमार्जन गर्ने तालिका अनुसार यसवर्ष कक्षा ७ को पालो परेको छ । त्यसो भए कक्षा ७ मा यसै वर्षदेखि क्रिकेट कोर्ष समावेश हुन्छ त ? ‘यसै वर्ष त भन्न सकिन्न, तर शारिरीक विषयमा क्रिकेट कोर्ष राख्नुपर्ने महसुस भने सरकारले पक्कै गरेको छ ।’
त्यसो त विद्यालयले आफ्नो तर्फबाट स्थानीय आवश्यकता महसुस गरी कोर्षमा नभएको खेल पनि समावेश गर्न सक्छन् । तर अहिलेसम्म सरकारी स्कुलमा क्रिकेट सम्बन्धी पठनपाठन नभएको पाण्डेले बताउनुभयो ।
केही निजी विद्यालयहरुले भने यसअघि नै विद्यार्थीलाई क्रिकेट सम्बन्धी ज्ञान दिन थालेका छन् । स्कुलको कार्यक्रम हुँदा अरु खेलजस्तै विद्यार्थीहरुबीच क्रिकेट प्रतियोगिता पनि गराइन्छ ।
अब चाहिँ कोर्षमै क्रिकेट खेल समावेश गर्ने निजी विद्यालयहरुको तयारी छ । ‘शायद यसै वर्षदेखि केही निजी स्कुलले क्रिकेट कोर्ष समावेश गर्छन्’ प्याब्सनका महासचिव डिके ढुंगानाले उज्यालो अनलाइनसित भन्नुभयो । उहाँका अनुसार अर्को वर्षदेखि भने सबै स्कुलले ६ कक्षादेखि क्रिकेट कोर्ष पढाउन थाल्नेछन् ।
अहिले निम्न माध्यमिक तहसम्म स्वास्थ्य र शारिरीक शिक्षा अनिवार्य विषयको रुपमा पढाइन्छ भने जनसंख्या समेत थपेर ९ र १० मा यसलाई ऐच्छिक विषय बनाइएको छ । अहिलेसम्म कक्षा ६, ७ र ८ पढ्ने विद्यार्थीले शारिरीक शिक्षमा क्रिकेट खेल पढ्न र अभ्यास गर्न पाउँदैनन् । कोर्षमा फुटबल, भलिबल, कपर्दी, खो खो, दौड लगायतका खेल मात्र समावेश छन् ।
सर मिसले पढाउँदा क्रिकेट खेल्न नपाएपनि स्कुलमा फुर्सद हुने बित्तिकै विद्यार्थीहरु अरु खेल छाडेर ब्याट र बल बोकेर उफ्रन थाल्छन् । उनीहरुको यस्तो रुची, उत्साह र क्रेजले स्कुलको कोर्षमै क्रिकेट पनि समावेश हुने भएको छ ।